Түбән Камада агачларның ябалдашларын кисү дәвам итә

Бүген агачларны формалаштыру Урман урамында алып барыла. Территориядә техника белән «КПБ» МУП хезмәткәрләре бригадасы эшли. Бензинлы пычкылар һәм ботак кискечләр белән коралланып, белгечләр агачларның ябалдашларын кисә.

Яшелләндерү участогы җитәкчесе Татьяна Исаева билгеләп үткәнчә, мондый эшләрне вакытында башкарырга кирәк. «Яшел агачларга кирәкле форма бирү өчен ябалдашларны кисү кирәк. Мондый эш үсемлекнең тышкы кыяфәтен генә түгел, ә аның эчке халәтен дә яхшырта, яңа үсентеләр барлыкка килә, агачлар яшелрәк һәм матуррак була. Моннан тыш, агачлар юлны капламый һәм җәяүлеләр өчен куркыныч тудырмый», -ди ул.

Белгечләр бу эшләрне Вахитов проспектында, Спорт һәм Яшьлек урамнарында үткәрде. Татьяна Исаева сүзләренчә, шәһәр буенча бу чаралар «сок хәрәкәте» башланганчы үткәреләчәк: «Гомумән, безнең эш ел әйләнәсе алып барыла: җәй көне — формалаштыру, көз көне — санитар кисүләре үткәрәбез».

Кайбер эшчеләр ботакларны киссә, икенчеләре тәртип урнаштыра. «Тиздән без үлән чабуга керешәчәкбез, шуңа күрә «чүп-чарны» үзебездән соң калдырмыйбыз», — диде яшелләндерү участогы җитәкчесе.