Түбән Камада 15 октябрьдән яңа автобус маршруты йөри башлаячак

Түбән Камада 15 октябрьдән 35 нче автобус йөри башлаячак. Шуңа бәйле рәвештә 59 нчы маршрутның хәрәкәт схемасы үзгәрәчәк, дип хәбәр ителә Түбән Кама җәмәгать транспорты сайтында. 

35 нче автобус маршруты түбәндәгечә хәрәкәт итәчәк: «Вокзал» тукталышы, аннан Корабельная урамы буенча хәрәкәт итә, Гайнуллин урамына керә, аннан соң Тынычлык проспекты буенча «2 нче шәһәр хастаханәсе» тукталышына кадәр хәрәкәт итә һәм шул ук маршрут буенча кире кайта.

59 нчы автобус хәрәкәт маршрутын үзгәртә. Ул Корабельная урамына ( «РК Лагуна» тукталышы) кермәячәк, шунда ук Химиклар проспектыннан Гайнуллин урамына юнәләчәк. Шулай ук Тынычлык проспектының ахырына да кермәячәк («44 микрорайон», «45 микрорайон» тукталышлары). Калган маршрут хәрәкәте элеккечә калачак.