Түбән Кама юлларындагы чокырларга салкын асфальт белән ремонт ясау башланды

Түбән Камада юл төзүчеләр, «салкын асфальт» ысулын кулланып, юллардагы чокырларга ремонт ясый башладылар. Технология −15 градуска кадәр температурада эшләргә мөмкинлек бирә.

Белгечләр сөйләгәнчә, алар чокырларны киптерәләр, праймер белән эшкәртәләр, горелкалар белән җылыталар, салкын асфальт белән тутыралар һәм виброплита белән тыгызлыйлар.

«Мондый ремонт — машина йөртүчеләрнең куркынычсызлыгын һәм уңайлылыгын тәэмин итү өчен вакытлыча чара, ул хәрәкәтне тулысынча япмыйча гына зыянны тиз арада төзәтергә мөмкинлек бирә», — дип аңлатты алар.