Түбән Кама ишегалларын Яңа елга боз скульптуралары белән бизиләр

Түбән Камада йорт идарәсе хезмәткәрләре ишегалларны боз скульптуралары белән бизи башлады. Боз скульптуралары өчен «төзелеш материалын» җирле сулыкларда әзерлиләр.

Сишәмбе көнне «Жилье» торак идарәче компаниясенең «ПЖКХ-17-НК» подрядчы оешмасы Гайнуллин һәм Бакый Урманче урамындагы 4нче һәм 6нчы йортлар ишегалларында боз ансамбле төзеде. Шулай ук боз блоклары белән агачлар өчен пьедесталлар ясадылар, иллюминацияне тоташтырдылар. Бу ишегалдында чыршы шәһәрчеген ачу 22 һәм 23 декабрьгә планлаштырылган. Ул 17.00 сәгатькә билгеләнгән.

Бүген үк, кичке сәгать 5тә дә, Химиклар проспектындагы 72б һәм Тынычлык проспектындагы 17нче йортлар ишегалдында яңа ел мәйданчыклары ачылачак.