Радмир Беляев түбәнкамалыларны «Гаилә» паркының 4 нче чираты концепциясен тәкъдир итүгә чакырды

Түбән Кама муниципаль районы башкарма комитеты җитәкчесе вазифаларын башкаручы Радмир Беляев түбәнкамалыларны «Гаилә» паркының дүртенче чираты концепциясен тәкъдир итүгә һәм фикер алышуга чакырды.

Чара 19 майда 17:00 сәгатьтә «База» креатив индустрияләр үзәгендә Лесная урамы, 53 адресы буенча узачак.

Үзенең телеграмм-каналында шәһәр җитәкчесе ике башлангыч эскиз бастырды һәм планлаштырылган объектлар белән таныштырды.

«Шинчылар проспектына якынрак буш урында күпфункцияле ял итү зонасы булдырырга тәкъдим ителде, анда технологияләр һәм табигый ландшафт гармонияле баланс саклаячак. Шулай ук территориядә фонтан, фестиваль мәйданчыгы, велосипед трассалары булган экстрим-зона, экомаршрутлар, йога белән шөгыльләнү урыны һәм балалар өчен урман мәйданчыгы каралган. Парк территориясендә өч яңа объект төзергә тәкъдим итәләр: террасалы гаилә рестораны, капитаннар клубы белән су янында активлык өчен прокат пункты һәм ботаника бакчасында экопавильон. Соңгысында күчмә никахлашу тантаналарын уздыру, эко-мәктәп ачу һәм галерея киңлеген оештыру планлаштырыла».

«Гаилә» паркын төзекләндерүнең дүртенче чираты уңайлы шәһәр мохитен булдыруның иң яхшы проектлары Бөтенроссия конкурсында катнаша. Түбән Кама халкы аның өчен 12 июньгә кадәр ТР Дәүләт хезмәтләре порталында, gorodsreda.tatar.ru сайтында һәм «Услуги РТ» кушымтасында тавыш бирә ала. Проект беренче урынны алган очракта, 2026 елда аны гамәлгә ашыру башланачак.

«Кадерле түбәнкамалылар, безгә Сезнең белән бергә «Гаилә» паркының киләчәк язмышын хәл итәргә туры киләчәк! «Гаилә» үзәк паркы шәһәребезнең йөрәгенә әверелде. Ул тулы куәтенә эшләсен өчен, безгә Сезнең белән бу территорияне төзекләндерү концепциясен билгеләргә һәм уртак көчләр белән паркны төзекләндерү федераль программасына керәчәк объектлар исәбенә кертергә кирәк. Сезне уңайлы шәһәр мохите булдыруның иң яхшы проектлары Бөтенроссия конкурсында тавыш бирүдә активлык күрсәтергә чакырам. Җиңгән очракта без киләсе елда «Гаилә» паркы территориясен төзекләндерүнең чираттагы дүртенче этабын башлап җибәрә алачакбыз», — дип өндәде шәһәр халкын Радмир Беляев.