Хокук сакчылары түбәнкамалыларның битлек кию режимын тикшерә

Полиция хезмәткәрләре урамнарны һәм кибетләрне, автобус салоннарын тикшерү белән мәшгуль. Кагыйдәләрне бозучыларны штрафлар көтә. Рейд вакытында хокук сакчылары шулай ук өлкән кешеләргә битлек таратканнар. Мондый тикшерүләр көн саен булачак.

Рейд шәһәребезнең үзәк базарында да узды. Бер ай дәвамында буш торгач, базар комплексы, ниһаять, кабат ачылды. Сатучылар кагыйдәләрне төгәл үти. Антисептик, битлек, перчаткалар – барысы да бар. Сатып алучылар әлегә күп түгел, әмма 2-3 атнадан артачак, дип көтелә.

Полиция хезмәткәрләре кибетләргә дә керделәр. Бу юлы штрафлар салынмады, әлегә кисәтү белән чикләнделәр, куркынычсызлык чаралары булмаганнарга битлек тараттылар.

Такси йөртүчеләре һәм пассажирлары да игътибардан читтә калмады. Рейдлар иртәдән кичкә кадәр дәвам итте. Йөртүчеләрне алдан ук кисәтеп куйсалар да, кайберләре эшкә әзерләнмичә чыккан. Аларына минималь штрафлар салынды. Ә менә пассажирлар бик җаваплы икән, битлексезләре табылмады.

Фото ntr-24.ru сайтыннан.