Түбән Камада «Кышкы каникуллар» операциясе узачак

Түбән Камада 2024 елның 23 декабреннән 2025 елның 8 гыйнварына кадәр «Кышкы каникуллар» оператив-профилактик чарасы узачак. Шәһәрнең Дәүләт автоинспекциясе матбугат хезмәтендә сөйләүләренчә, аның төп максаты — мәктәп каникуллары вакытында балалар катнашындагы юл-транспорт һәлакәтен кисәтү.

Рейд чаралары барышында юл-патруль хезмәте экипажлары балалар күпләп йөри торган урыннарга һәм җәяүлеләр кичүләренә якынлашачак.

«Түбән Кама дәүләт автоинспекциясе ата-аналарны яңа ел бәйрәмнәре вакытында юлларда балаларның куркынычсызлыгына игътибарны көчәйтергә, үз үрнәкләре белән аларда юл хәрәкәте культурасын формалаштырырга чакыра», — дип яза дәүләт автоинспекциясенең матбугат хезмәте.