Түбән Кама районы юлларында 2024 ел башыннан 69 кеше зыян күргән

Түбән Кама районында бүгенге көндә 53 юл-транспорт һәлакәте теркәлгән, аларда 4 кеше һәлак булган һәм 69 кеше зыян күргән.

Районның Дәүләт автоинспекциясе матбугат хезмәте хәбәр иткәнчә, аварияләрнең төп сәбәпләре: каршы як полосага чыгу, тизлекне арттыру, куркынычсызлык каешларын санга сукмау, арыган хәлдә яки исерек килеш автомобиль белән идарә итү.

Иң авыр нәтиҗәләр кара-каршы бәрелүләргә туры килә. Каршы як полосага чыгу сәбәпле, Түбән Кама районында 7 юл-транспорт һәлакәте теркәлгән, аларда бер кеше һәлак булган һәм 13 кеше зыян күргән.

«Алда барган машинаны узып китү — иң катлаулы һәм куркыныч маневр. Тыелган урыннарда узып китмәскә, ә инде рөхсәт ителгән урында юлның буш булып, маневрның куркыныч булмавына инанганнан соң гына, алда барган машинаны узып китәргә киңәш ителә», — дип искәртә инспекторлар.

Моннан тыш, җәйге сезон башлану белән юлларда велосипед һәм электросамокатлар саны артты. Мондый транспорт төрен сайлаган кешеләргә шуны истә тотарга кирәк: җәяүлеләр кичүе буенча юл аркылы чыкканда велосипедтан яки самокаттан төшәргә, аларны янәшә алып барырга кирәк. Шулай ук хәрәкәт итү чарасын төрле яктылык җайланмалары белән күренерлек итү мөһим.