Түбән Кама автоинспекторлары велосипедта йөрү кагыйдәләрен искә төшерде

Җылы һава торышы урнашуга, Түбән Камада велосипедта һәм самокатларда йөрүче балалар күбрәк очрый. Шуңа бәйле рәвештә ЮХИДИ хезмәткәрләре куркынычсызлык кагыйдәләрен искә төшерә.

14 яшькә кадәрге велосипедчылар тротуарларда һәм велосипедта йөрү өчен махсус билгеләнгән юлларда гына хәрәкәт итәргә тиеш. Машина юлында велосипедта йөрү, велосипедчылар өчен махсус юл булмаган очракта гына һәм 14 яшьтән өлкәнрәк кешеләргә генә рөхсәт ителә.

Моннан тыш, велосипедчының өстәмә куркынычсызлык чаралары булырга тиеш: болар — шлем, аякка һәм кулга киелә торган махсус саклагыч җайланмалар.

Көннең караңгы вакытында киемдә һәм велосипедта яктылык кайтаручы элементлар булу мөһим. Юлны аркылы чыккан вакытта велосипедтан төшәргә киңәш ителә.