Түбән Камада мошенниклар 17 яшьлек студент кызны 73 мең сумга алдаган

Түбән Камада медицина көллиятенең 17 яшьлек студенткасы интернет-мошенниклар корбаны булган.

Татарстан Эчке эшләр министрлыгы матбугат хезмәтендә сөйләүләренчә, мессенджерларның берсендә билгесез кеше кызның зур суммада акча отуы турында хәбәр итә. Алдауга ышанып, ул җинаятьчеләргә әнисе картасыннан 73 мең сумнан артык акча күчерә.

Аферистлар кызны акча отуының чын булуына ышандыру өчен, имеш моңа кадәр откан кешенең фотосын һәм аңа 150 мең сум акча күчерелүе турында документлар җибәрә. Вәгъдә ителгән бүләкне алу өчен кыз төрле суммаларны күчерә — 1 меңнән 15 мең сумга кадәр — янәсе карта рәсмиләштерү, салым түләү, лицензияле җыем һәм башка хезмәтләр өчен.

Бу хәл турында студент кыз барысын да әнисенә сөйләгәч билгеле була. Эштә булганлыктан, картасыннан акчаларның юкка чыгуын ул вакытында күрми кала.

Әлеге очрак буенча «Мошенниклык» маддәсе буенча җинаять эше кузгатылган.