Түбән Кама пенсионеры чит кешеләргә банк картасының фотосын җибәргән һәм акчасын югалткан

Зыян күрүче сүзләренчә, 11 мартта аңа билгесез кыз шалтырата, ул үзен банк хезмәткәре дип таныштыра. Әңгәмәдәше ир-ат исеменә кемнеңдер кредит рәсмиләштерергә тырышканы турында хәбәр итә.

Аннары пенсионер белән «иминлек хезмәте хезмәткәре» элемтәгә кергән. Ул кеше түбәнкамалыдан банк картасы һәм СНИЛС фотоларын җибәрүен сорый. Шуннан соң ир-атка банк операторы шалтырата һәм ул кемгәдер 63 мең сум күләмендә акча күчергәнме-юкмы икәнен ачыклый. Шул вакытта гына пенсионер үзен алдаганнарын аңлап ала. 

Бу вакыйга буенча җинаять эше кузгатылган, дип хәбәр иттеләр Россия Эчке эшләр министрлыгының ТР буенча матбугат хезмәтендә.