Түбән Кама мөхтәсибәте вәкилләре Луганск республикасына хәләл продукция китерде

Түбән Кама делегациясе Алчевск шәһәрендә гуманитар миссия белән булып кайтты. Бу хакта шәһәр хакимияте матбугат хезмәте хәбәр итә.

Сәфәрнең максаты — Луганск Халык Республикасы халкына рухи-әхлакый ярдәм күрсәтү. Шуңа күрә Әбделхәким хәзрәт Яруллин җитәкчелегендәге сәфәр барышында Түбән Кама делегациясе «Таң» татар мәдәни үзәгендә булды. Үзәк җитәкчесе Флүр Карачурин шәһәр халкы һәм җитәкчелеге белән очрашу оештырды.

Татарстанлылар биредә яшәүчеләргә хәләл продуктлар, мобилизацияләнгән кешеләр өчен җылы әйберләр һәм китаплар алып килде.

«Бу акциядә катнашкан барлык битараф булмаган түбәнкамалыларга зур рәхмәт», — дип билгеләп үттеләр администрациядә.