Эльмира Кәлимуллина Түбән Камада яшь вокалистлар өчен мастер-класс үткәрде

Җырчы Эльмира Кәлимуллина «Түбән Кама музыка көллияте» ндә мастер-класс үткәрде. Артистка белән колледж студентлары, 2 нче музыка мәктәбе укучылары һәм педагоглар очрашты.

Эльмира Кәлимуллина чыгышы белән Түбән Камадан. Очрашуда ул үзенең иҗади юлының ничек башлануы турында сөйләде, вокал осталыгы серләре белән уртаклашты һәм яшь вокалистлар һәм укытучыларның сорауларына җавап бирде.

Эльмира үзенең талантын да күрсәтте, танылган әсәрләрдән өзекләрне академик, халык һәм эстрада җыр манераларында башкарды, дип хәбәр итә мәдәният идарәсе матбугат хезмәте.

Исегезгә төшерәбез, 36 яшьлек Эльмира Кәлимуллина Беренче каналдагы «Голос» шоу-тамашасының финалисты. Ул җырчы Пелагея командасында чыгыш ясады. 2012 елда аңа Татарстанның атказанган артисты исеме бирелде.