Түбән Камада этләр өчен приют төзиләр

Түбән Камада йортсыз хайваннар өчен приют төзиләр, ул 150 эт сыйдыра алачак. Бу хакта «Бюро городских решений» паблигы хәбәр итә.

Проект муниципаль хакимият ярдәме белән «Дом Надежды» йортсыз хайваннарга ярдәм итү хәйрия фонды тарафыннан грант акчаларына гамәлгә ашырыла.

Хәзерге вакытта территорияне койма белән әйләндереп алу төгәлләнгән, планлаштырылган 55 вольерның 28е һәм булачак көнкүреш бинасының каркасы төзелгән. Киләсе этапта хуҗалык блогы, санитария бүлмәсе, волонтерлар өчен ял итү урыннары, карантин зонасында эчке бизәү эшләре башкарылачак һәм коммуникацияләр салыначак.

Приютка кабул ителгән барлык йортсыз этләр стерилизацияләнә һәм чиплаштырыла, таләп ителгәндә аларга медицина ярдәме күрсәтеләчәк.

Хайваннарны яклаучылар вәгъдә иткәнчә, этләр су белән тәэмин ителә торган 3×6 метрлы иркен вольерларда яшәячәк, ә этләрнең һәр төркеме өчен аерым йөрү блогы каралган.

Төзелешне 2025 елда тәмамларга планлаштыралар.