Елан чакканнан соң түбәнкамалы реанимациягә эләккән

Түбән Камада 44 яшьлек хатын-кызны елан тешләгән. Аны реанимациягә авыр хәлдә алып киләләр. Бу хакта үзәк район хастаханәсенең матбугат хезмәте хәбәр итә.

Хастаханәгә хатын-кыз узган атнада эләгә. Медицина ярдәме күрсәтелгәннән соң аның хәле бераз яхшыра. Бу дүшәмбедә аны 2 нче хирургия бүлегенә күчергәннәр. Монда ул табиблар күзәтүе астында һәм кирәкле барлык дәвалауны ала. Хәзер пациентның хәле канәгатьләнерлек дип бәяләнә.

Узган атнада «ашыгыч ярдәм» бригадасы хастаханәгә 430 пациент китергән, шуларның 202се госпитализацияләнгән.