Юбилейлы сабый да бар

15 гыйнварда Никахлашу сараенда быел иң беренче пар гаилә корган. 22 яшьлек түбән-камалылар Рәмзил Газизов һәм Айсылу Раимова максатчан һәм эш сөюче гаилә үрнәге булып тора. Кияү кеше – «Стройсервис» ҖЧҖндә, ә кәләш «ТАИФ-НК» АҖндә хезмәт куя. Яшьләрне ЗАГС идарәсе начальнигы Бэлла Махотина үзе котлаган һәм ЗАГС идарәсенең юбилей сертификатын тапшырган.
Быел беренче сабый 1 гыйнварда 14.48 сәгатьтә дөньяга аваз салган. Алинә (кызчыкка шундый исем биргәннәр) Нина һәм Реган Зөлкарнаевлар гаиләсендә туган. Алар Алабуга шәһәрендә яши.
2021 елда туган беренче якташыбыз Алиса исемле. Әти-әниләре – Дарья һәм Данил Андрияновлар. Елның беренче көнендә Түбән Камада барлыгы биш сабый туган.
55 нче «юбилейлы» сабый 9 гыйнварда Наталья һәм Вениамин Плотниковлар гаиләсендә дөньяга килгән. Алтынчы кызларына әти-әнисе Наталия дип исем кушканнар. Бу гаилә шәһәрдә күпләргә таныш. Наталья һәм Вениамин кызлары белән шәһәркүләм чараларда, конкурсларда катнаша, иҗат белән шөгыльләнә. Әти кеше «КамаТрансСервис» предприятиесендә – йөртүче, әниләре исә «Нефтехим-Медиа»да басма мәгълүмат чаралары редакторы вазыйфаларын башкара.

Фото: ЗАГС идарәсе сайтыннан