Түбән Кама районында бер ир-ат күлдә батып үлгән

Якшәмбе көндез ашыгыч хезмәтләр чакыру өчен бердәм номерга Түбән Кама районының Ильинка авылы янындагы Юрт күлендә ир-ат мәете табылу турында хәбәр килә. Бу хакта Россия Гадәттән тыш хәлләр министрлыгының Татарстан буенча Баш идарәсендә хәбәр иттеләр, дип яза «Татар-информ».

Яр буенда бары тик резин башмаклар гына калган, диелә хәбәрдә.

Водолазлар 60 яшьлек ир-атның мәетен ярдан 5 метр ераклыктан алып чыккан.

Якынча мәгълүматлар буенча, фаҗиганең сәбәбе — сулыкларда үз-үзеңне тоту кагыйдәләрен бозу. Бу күл су коену өчен җиһазландырылмаган булган, диелә хәбәрдә.