Түбән Кама районы күлендә ир-егет суга баткан

Түбән Кама районының «Нефтехимик-1» бакчачылыгы янындагы Каракүл күлендә су коенганда 30 яшьлек ир-ат югалган.

Россия гадәттән тыш хәлләр министрлыгының ТР буенча Баш идарәсендә хәбәр итүләренчә, урынга оператив рәвештә водолазлар килгән. Баткан кешенең гәүдәсе ярдан 15 метр ераклыкта өч метр тирәнлектә табылган.

Су һәм һава температурасы арасындагы аерма аркасында ир-атны көзән җыерган яки үпкә спазмы булган булырга мөмкин. Моннан тыш, күл төбендә ир-атны җәрәхәтләргә мөмкин булган чит предметлар да була ала. Бу урын су коену өчен җиһазландырылмаган.