Татарстанда елгада ике кеше батып үлгән

5 декабрьдә 21:30 сәгатьтә Зәй шәһәренең Зәй (Степной Зай) елгасында шаһитлар кеше гәүдәсен хәтерләткән кара тап күреп алалар.

Урынга чакырылган коткаручылар ярдан 40 метр ераклыкта ике кешенең мәетен таба.

Суга батучы беренче кеше — 72 яшьлек ир-ат. Россия гадәттән тыш хәлләр министрлыгының Татарстан Республикасы буенча матбугат хезмәтендә хәбәр итүләренчә, һәлак булган икенче кешенең шәхесе ачыклана.

Коткаручылар искә төшерә: бозлары әле генә каткан сулыкларга чыгу тормыш өчен куркыныч булырга мөмкин.