Түбән Камадан тагын бер команда килешү буенча хәрби хезмәткә җибәрелде

Дүшәмбе, 8 июльдә, Түбән Камада Оборона министрлыгы белән килешү төзегән 16 ир-атны озаттылар. Аларны озатырга иң якыннары килде. Хәрбиләрнең кәефе җитди, ә арттырылган түләүләр тылда барысы да яхшы булачагына ышаныч бирә.

Булачак хәрбиләргә карар кабул итү җиңел булмый, тик шулай да, алар аны кабул итә һәм Ватан сагына баса. Ир-атларны махсус операция ветераннары, администрация вәкилләре, волонтерлар озатты. Хәрби комиссар Газинур Ситдыйков, башкарма комитеты җитәкчесе Роман Булатов һәм СТОС рәисе Лариса Орлова да үгет-нәсыйхәт сүзләре әйтте.

Килешү төзегән һәр кеше акчалата түләү ала. Татарстан Рәисе Рөстәм Миңнеханов инициативасы буенча 50 процентка — 1,5 миллионга кадәр арттырдылар.

«Без хәрби посттагылар турында истә тотарга тиеш. Алгы сафтагы хәрбиләр үз гаиләләре өчен тыныч булырга тиеш һәм бу безнең бурыч», — дигән иде баштарак республика җитәкчесе.

Яңа килешү төзегән кешеләргә, финанс ярдәменнән тыш, барлык республика һәм федераль ташламалар, ярдәм чаралары һәм тернәкләндерү гарантияләнә. Хезмәткәрләре килешү төзегән оешмалар аларның эш урыннарын саклап кала һәм хезмәт хакын түләп бара, кирәкле бар нәрсә белән дә тәэмин итә. Җирле хакимиятләр хәрбиләрнең гаиләләрен опекага ала.

Искәртеп үтик, килешү төзүчеләрне туплау дәвам итә. Хәзер махсус операциягә медицина хезмәткәрләре, БПЛА операторлары, автомобиль йөртүчеләр, артиллеристлар кирәк. Килешү буенча хезмәткә җыю пунктларында теләгән кешеләргә белгечлек һәм частьне сайларга ярдәм итәләр.

Хәзерге вакытта «Батыр» батальонына хәрбиләр туплыйлар, ул яңа территорияләрне саклау белән шөгыльләнәчәк.

Бүген озатылган 16 ир-ат махсус операция зонасына җибәрелгәнче тиешле курслар узачак. Шуннан соң хәрбиләр Оборона министрлыгының төрле бүлекчәләрендә хезмәт итәчәк.

Хәзер потенциаль хәрбиләр өчен килешү шартлары тагын да кызыклырак. Татарстанда бер тапкыр 1,5 миллион сумга кадәр алырга була, хәрбиләргә ай саен 210 меңнән башлап акча түләнә. Арттырылган түләүләрне 2024 елның июнь-июль айларында алырга була. Тулырак 8 (800) 222-59-00 телефонына шалтыратып белешергә була.