Түбән Камада онкология үзәге булдыру планлаштырыла

Түбән Камада республика клиник онкология диспансерының (РКОД) филиалын булдыру планлаштырыла. Шәһәр мэры Рамил Муллин бу мәсьәлә буенча баш табиб Илгиз Һидиятов җитәкчелегендәге РКОД делегациясе белән фикер алышты, дип хәбәр итә администрациянең матбугат хезмәте.

Очрашу нәтиҗәләре буенча шәһәрдә заманча онкоүзәк төзү турында килешүгә ирешелде. Бу объект өчен бина сайланган инде, һәм тиздән РКОД белгечләре техник биремне эшли башлаячак, анда кирәкле санда операция бүлмәләре, җиһазлар һәм персонал күрсәтеләчәк.

Яңа үзәктә онкология авыруларын иртә диагностикалауга аерым игътибар бирелер дип планлаштырыла. Түбән Кама мэры дәвалауның нәтиҗәлелеген арттыру өчен авыруларны вакытында ачыклауның мөһимлеген ассызыклады һәм шәһәр халкын даими рәвештә диспансеризация узарга өндәде.

Түбән Камада заманча онкология диспансеры ачылу, шәһәр, район һәм якын-тирәдәге торак пунктларда яшәүчеләргә заманча медицина ярдәменнән файдалану мөмкинлеге биреп һәм онкология авыруларын дәвалауның нәтиҗәлелеген арттырып, Татарстанның сәламәтлек саклау өлкәсен үстерүдә мөһим адым булачак.