Түбән Камада икенчел чимал кабул итү буенча 3 пункт ачылачак

Түбән Камада янә «Калдыкларны керемнәргә» дип исемләнгән традицион экологик акция үткәрелә.

Икенчел чимал җыю 23 декабрьдә Балалар экология-биология үзәге территориясендә 11-11:50, «Ковёр» яшьләр үзәгендә 12-12:50 һәм балалар автошәһәрчегендә 13-14 сәгатьләрдә башкарылачак.

Түбәнкамалылар иске китаплар, журналлар, картон, газеталар, кәгазьләр тапшыра ала. Макулатураны әле үлчәргә дә кирәк булганлыктан, аны яхшырак төрергә кирәк, дип кисәтә оештыручылар.

Моннан тыш, пластик, алюминь банкалар, пыяла кабул ителә.

Икенчел чимал өчен төренә карап килограммына 2 сумнан 25 сумга кадәр түләү каралган.