Түбән Кама мэры Рамил Муллин «Ак каен» мәчете төзелеше белән танышты

Түбән Кама мэры Рамил Муллин кичә «Ак каен» мәчете төзелеше белән танышты, дип хәбәр итә шәһәр администарциясенең матбугат хезмәте. 

Мәчет шәһәрнең 35а микрорайонында урнашкан. Ул 2019 ел ахырында төзелә башлады.

Мәчетне ачык төсләрдә төзергә планлаштыралар, фасады кирпечтән булачак. Биредә инде электр монтажлау эшләре тәмамланган, җылыту һәм вентиляция эшли башлаган. Белгечләр эчке бизәү белән шөгыльләнәләр. Ике катлы бина 400 дән артык кешене сыйдыра алачак. Мәчет тирәсендә территория төзекләндереләчәк.

«Визитның максаты — объектның бүген нинди стадиядә булуын карау. Безнең өчен бу бик мөһим, чөнки быел мәчет янында балалар поликлиникасы ачарга планлаштырабыз, хәзер ул да төзелә», — дип билгеләп үтте Рамил Муллин.

Мәчет төзелеше тулысынча иганә акчасына алып барыла. Барлык төп эшләрне быел тәмамлап, мәчетне киләсе елда тулысынча тапшыру планлаштырыла.