Татарстанлылар «Үлемсез полк» өчен фотоларны күп функцияле үзәк офисларында бушлай бастыра алачак

Татарстанлылар «Үлемсез полк» йөреше өчен ветераннарның фотоларын бушлай бастыра алачак.

Хезмәтне КФҮ (МФЦ) офисы бүлекчәләрендә алырга мөмкин булачак. Рәсемнәр альбомнардан һәм электрон саклагычта да кабул ителә. 

Фотоны барлык филиалларда да бастырып чыгарып булмый. Әзер фотоны заказ урынына китерү өчен биш эш көне кирәк булырга мөмкин. Шуңа күрә фото ясату хәстәрен алдан күреп кую яхшырак булыр.

МФЦда хезмәтне 6 майга кадәр алырга мөмкин. 7, 8, 9 майда «Минем документларым» офислары эшләмәячәк, дип искәртә ТР КФҮ ДБУ директоры Ленара Мөзаффарова.