Роспотребнадзорда талпаннардан саклану ысуллары турында сөйләделәр

Татарстанда талпаннар уянган инде. Узган атнада Түбән Кама районында урман бете кадалуның 9 очрагы теркәлгән.

РФ Роспотребнадзорында табигатьтә йөргәндә талпаннардан ничек сакланырга кирәклеге турында киңәшләр бирделәр.

• Белгечләр ачык төсле, озын җиңле һәм озын балаклы кием сайларга киңәш итә. Мондый киемдә «чакырылмаган кунакларны» табу җиңел, ә аларга тиренең ялангач өлешенә үтеп керү дә авыррак булачак;
• Талпаннарны куркыту өчен махсус репеллентлар кулланырга мөмкин. Мондый чараларны тәнгә түгел, киемгә сиптерергә кирәк.
• Үләнгә ятарга ярамый; 
• Кайткач үзегезне һәм якыннарыгызны җентекләп тикшерегез. Талпаннарны гадәттә бил һәм касык тирәсендә, култык астында, колак артында табарга мөмкин.

Инде талпан кадалган икән, кичекмәстән хастаханәгә мөрәҗәгать итәргә кирәк.