2024 елда Түбән Камада бюджет хезмәткәрләренең хезмәт хакы 4 процентка артачак

Түбән Камада советларның берләштерелгән сессиясе узды, анда 2024 елга район һәм шәһәр бюджеты турында фикер алыштылар һәм башкарма комитетның яңа структурасын расладылар.

2024 елның 1 октябреннән бюджет хезмәткәрләренең хезмәт хакы 4 процентка артачак. Гомумән алганда, бюджет чыгымнарының зур өлеше мәгариф учреждениеләренә китә — 3,5 млрд сумнан артык.

«Хезмәт хакына һәм исәпләүләргә төп өлеш — 72,5 % җибәрелә. Туклануны оештыруга чыгымнар — 10,7 %, коммуналь хезмәтләр өчен түләүгә чыгымнар 6,2 % тәшкил итә», — дип билгеләп үтте Түбән Кама муниципаль районының бюджет һәм финанслар департаменты җитәкчесе Светлана Логинова.

Бюджеттан тыш, сессиядә тагын берничә мөһим мәсьәлә каралды. Түбән Кама районы советы башкарма комитетның яңа структурасын раслады. Барлык структур бүлекчәләр һәм ведомство карамагындагы учреждениеләр хәзер 5 төп юнәлешкә бүленгән, алар белән башкарма комитет җитәкчесе урынбасары Роман Булатов җитәкчелек итәчәк. Шуңа бәйле рәвештә җитәкчеләр саны 2 тапкырга кимеде.

Шулай ук кадрларларда үзгәрешләре булды. Муниципалитет башлыгының 11 ярдәмчесе тәкъдим ителде, алар иҗтимагый нигездә эшләячәк һәм һәркайсына аерым юнәлешләр беркетеләчәк. Фәрит Мингариев традицион рухи әхлакый кыйммәтләрне саклаячак һәм ныгытачак. Алина Вәлиева шәһәрдәге инклюзия өчен җаваплы булачак. Гомумән, ярдәмчеләр Түбән Кама районының тормышын яхшыртуга юнәлдерелгән барлык өлкәләргә диярлек кураторлык итәчәк.