Исемнәре ташка уелган

Фотода: З. Рәхимова / Фото шәхси архивтан

Безнең Үчкә авылында да Бөек Ватан сугышында катнашкан авылдашларга Мәңгелек дан һәйкәле яңартылды. Аның ачылу тантанасы 8 майда үткәрелде.

Һәйкәлгә 116 сугышта катнашучы исемлеге теркәлгән, шуларның 55е сугыш кырларында ятып калган. Авылдашларны, бигрәк тә гаиләләрен шатландырып, 61е сугыштан исән кайткан.

Элекке һәйкәл моннан 30 ел элек Җиңүнен 50 еллыгы көнендә тантаналы рәвештә ачылган булган һәм бүгенгесе икенче урынга куелган. Бу һәйкәл зуррак һәм биегрәк тә, уңайлы урында урнаштырып, рәшәткә белән әйләндереп алынган.

Һәйкәлне ачу көнендә оештырылган митингта бөтен авыл халкы катнашты. Тантана барышында Каенлы авыл жирлеге рәисе Рәмис Нигъмәтжәнов Үчкә авылының хөрмәтле 95 яшьлек тыл ветераны Хәмидә Габдрахман кызы Нигъмәтҗановага бүләкләр тапшырды. Хәмидә апа бәетләр язучы да әле ул.