Түбән Каманың 10 нчы мәктәбе һәм 35 нче лицей коллективлары грантларга лаек булды

Түбән Каманың ике мәгариф оешмасы «Мәктәптә физика-математика алгарышы» грантын алуга конкурста җиңү яулады.

Шәһәр мәгариф идарәсе матбугат хезмәте язганча, 10 нчы мәктәп «Физика-математика сыйныфларында программаны гамәлгә ашырган өчен» номинациясендә җиңеп, 600 мең сум алган, ә 35 нче лицей «Физика, математика һәм информатика буенча укучыларның югары нәтиҗәләренә ирешкән өчен» номинациясендә 1 миллион сумга лаек булган.

Акча педагогик составка ярдәм итүгә: укытучыларга хезмәт хакын түләүгә, методик әдәбият сатып алуга һәм өстәмә квалификация күтәрү курсларына юнәлдереләчәк.