Түбән Камада иң яхшы укытучыларны бүләкләделәр

Түбән Камада «Адымнар» полилингваль гимназиясендә 8 Мартка багышланган бәйрәм концерты узды, анда иң яхшы укытучыларны бүләкләделәр. Чарага шәһәр һәм район мәгариф учреждениеләреннән 500гә якын педагог килде.

Мәгариф системасында күпьеллык намуслы хезмәтләре өчен 9 укытучы РФ Мәгариф министрлыгының «Мәгариф отличнигы» билгесенә лаек булды, 2 укытучы «Һөнәргә тугрылык өчен» күкрәк билгесе, тагын 3 педагог «Мәгарифтәге казанышлары өчен» билгесе алды.

29 нчы мәктәп укытучысы Зәйтүнә Сафиуллина «Татарстан Республикасының мәгариф һәм фән өлкәсе отличнигы» билгесе белән, ә Түбән Кама педагогика көллияте мәгариф ветераны Мәрьям Хәсәнова «Мактаулы остаз» билгесе белән бүләкләнде.