Түбән Камада 2024 елның иң яхшы тәрбиячесен сайладылар

Шәһәр администрациясенең матбугат хезмәте хәбәр иткәнчә, ярымфиналда 19 педагог катнашкан, ә финалга аларның унысы гына үткән.

Муниципаль этапның йомгаклау туры түгәрәк өстәл форматында оештырылды, анда катнашучыларга актуаль сораулар бирелде. Жюри аларны түбәндәге критерийлар буенча бәяләде:

• профессиональ компетенция;
• тәкъдим ителгән эш тәҗрибәсенең практик әһәмияте;
• кулланылган технологияләрнең эффективлыгы;
• чыгышларның эчтәлеге;
• иҗади шәхес;
• гомуми аралашу культурасы.

Барлык этаплар нәтиҗәләре буенча 9 нчы балалар бакчасы тәрбиячесе Гүзәл Галимова җиңүче булды. Икенче урынны 22 нче мәктәпкәчә учреждениенең татар, рус телләрен укыту буенча тәрбиячесе Гөлчәчәк Сәлимҗанова алды. Ә 24 нче балалар бакчасының укытучы-логопеды Марина Роткина өченче урыга ия булды.

Моннан тыш, төрле номинацияләрдә дә җиңүчеләр билгеләнде:

• «Иҗади педагог» — 82 нче балалар бакчасы тәрбиячесе Люция Хамадеева;
• «Яшь педагог» — 80 нче балалар бакчасы тәрбиячесе Юлия Перова;
• «Педагог-тикшерүче» — 87нче мәктәпкәчә учреждение тәрбиячесе Энҗе Галимуллина;
• «Педагог-новатор» — 31нче балалар бакчасы тәрбиячесе Ирина Гришина;
• «Педагог-остаз» — 57нче мәктәпкәчә учреждение укытучы-логопеды Татьяна Солихова;
• «Педагог-мастер» — 91нче балалар бакчасының музыка җитәкчесе Радмила Шәфигуллина;
• «Педагогик илһам» — 96 нчы балалар бакчасы тәрбиячесе Лилия Балюлова.

Конкурста җиңүчеләр Түбән Кама районын зона этабында тәкъдим итәчәк.