Түбән Кама китапханәчесе республика этабында шәһәр данын якларга әзерләнә

Түбән Кама районының иң яхшы китапханәчесе Бакый Урманче исемендәге икенче гимназиядә эшли. Гөлнара Галимова конкурсның муниципаль этабында җиңеп, үзенең югары һөнәри осталыгын исбатлады.

2 нче гимназия китапханәсендә китап фонды бик зур: биредә 24 мең китап бар, шуларның яртысыннан артыгы — дәреслекләр. Китапханәдә тиз арада кирәкле әдәбиятны табарга китапханә-библиография классификациясе ярдәм итә. 

Гөлнара Галимова китапханәче булып 18 ел эшли, соңгы 14 елын нәкъ менә 2 нче гимназиядә хезмәт куя. 

«Мин көненә 50-55 укучыга хезмәт күрсәтәм. Нигездә мәктәп программасы буенча китаплар сорыйлар», — дип сөйләде Гөлнара Галимова.

«Бу этапта без китапханәнең тышкы кыяфәтен карыйбыз. Документлар, күргәзмәләр булырга тиеш», — дип аңлатты Түбән Кама муниципаль районының мәгариф үзәге методисты Людмила Яковлева.

Хәзер Түбән Кама районының иң яхшы китапханәчесе республика этабында шәһәр данын якларга әзерләнә.