Намаз — диннең терәге

Түбән Каманың Үзәк мәчетендә «Намаз — бәхеткә ачкыч» дигән исем астында хатын-кызларны һәм ир-атларны намаз укырга өйрәтүче дәресләр курсы дәвам итә.

Курсларның чираттагысына 16 ир-ат һәм 40 хатын-кыз килгән иде. Шимбә көннәрне алар мөгаллимнәрне тыңлыйлар һәм өй эше алалар, бер атнадан яңадан очрашалар. Бу юлы остазларына «өй эшләре»н тапшыралар, хаталар өстендә эш алып баралар. Шулай итеп, биш дәрестә кеше теләсә кайсы яшьтә, Ислам таләпләре буенча, намазны дөрес итеп укырга өйрәнә ала, бары тик теләк кенә булсын.