Туган як

Тамашачыга бүләк ясадылар

Каенлы мәдәният йортында эшләүче «Тамаша» халык театры быел да «Идел-йорт» төбәкара халык театрлары фестивалендә катнаша.

2019 ел Россиядә Театр елы дип игълан ителде, ә 27 мартта, Халыкара театр көнен исәпкә алып, без Хәбир Ибраһимовның «Кызыма килер йөз кеше» исемле 2 пәрдәле комедиясен Каенлы авылы халкына тәкъдим иттек. 
Зал халык белән шыгрым тулы, энә төртер урын да юк иде. Театр карарга килгән халык спектаклебезне бик ошатты, алкышларга күмде. Әсәрдә бүгенге көн – гаилә темасы, гаилә кыйммәтләре күтәрелә. Әти-әни үз баласы өчен ниләр генә эшләми! Утка керә, суга керә, әмма баласын авырлыклардан саклап калырга тырыша.
Спектакль төрле һөнәр ияләре көче белән сәхнәләштерелде. Каенлы авылы артистлары – балалар бакчасы хезмәткәрләре Резедә Бикчәнтәева, Рузилә Гайнетдинова, Илфат Яруллин, авыл Советы сәркатибе Гүзәлия Садыйкова, укытучылар Әхмәтсәгыйрь Гарипов, Илсөя Сәхәбиева, Рита Әхмәтова катнашты.
Авыр хезмәт көненнән соң, кичләрен мәдәният йортына килеп, айлар буе роль өйрәнеп, халыкка тормышчан тамаша бүләк иттеләр. Барчабыз да исән-сау булып, дөньялар тыныч булып, тагын да шулай спектакльләр куеп, халкыбызны сөендерергә язсын.
Сәхнәләрдә артист, 
            чын шикелле итеп,
Күпме үлә, күпме терелә!
Кешеләргә 
              җирдә яшәр өчен
Күпме куәт, 
             көч һәм рух бирә!

Разия ЯКУПОВА, «Тамаша» халык театры режиссёры.
Автор фотосы.
 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: