Капремонт һичшиксез кирәк

Хәзерге көндә урология бүлегендә югары категорияле табиб-хирург Рәсим Мотыйгуллин җитәкчелегендә 4 табиб - Татарстанның югары категорияле мактаулы табиб-хирургы Рафаэль Галиев, югары категорияле табиблар Олег Шварев, Равил Әхмәтшин, уролог Илдар Бишев һәм 9 шәфкать туташы хезмәт күрсәтә. Алар эшләрен яратып башкаралар, авыруларны якты йөз һәм җылы сүзләре белән дә сәламәтләндерәләр.

Мин 2013 елда урология бүлегендә ятып чыккан идем инде. Ул вакытта операциядән баш тартып, табибларга рәхмәтемне әйтеп, өй шартларында дәваландым. Шул елның 18 сентябрендә «Ваша газета»га «Отделение требует капремонта» дигән язма да бастырдым әле. Җитәкчеләргә дә хат яздым. Аннан соң 3 ел вакыт узган. Дөрес, ремонт ясаганнар, тик ямаулык формасында: тегендә - бар, монда - юк, дигәндәй... Бәдрәф - ташландык хәлдә, тәрәзә рамнары - чергән, төнлә җил-давыл чыккач, авырулар һәм медицина хезмәткәрләре уянып, аларны баулар белән бәйләп йөрделәр хәтта.

Биредә хезмәт куючы урология хезмәткәрләренә рәхмәт инде! Алар - энтузиастлар, патриотлар - эшлиләр, тырышалар.

Мин: «Чиновникларның, җитәкчеләрнең авырып монда эләккәннәре юкмы икән», дип тә уйлап куям кайчак. Шуңа күрә, биредәге табибларның хәлен белмиләрдер. Шулай да өметебезне өзмик әле, акча табып, урология бүлегенә дә капиталь ремонт уздырып, барыбызны сөендерерләр, дип ышаныйк.