Түбән Каманың яшь эзтабарлары кыргый табигать турында иң яхшы эшләр өчен бүләкләр алды

Түбән Камада балалар өчен «Мин — эзтабар» муниципаль конкурсына йомгак ясалды, ул инде 10 ел балалар экология-биология үзәге һәм Татарстан Республикасының Биологик ресурслар буенча дәүләт комитеты белән берлектә үткәрелә.

Укучылар жюри хөкеменә рәсемнәрне, хайван эзләре төшерелгән фотоларны һәм эшләнмәләрне тәкъдим итә алды. Барлыгы 150дән артык эш каралды. Конкурс кыргый хайваннарны кышкы исәпкә алуга багышланган иде. Эшләре иң яхшы дип табылган җиңүчеләргә Казан зоопаркына билетлар бирелде.

«Безнең конкурсның төп максаты — балаларны табигатьне саклауга җәлеп итү, алар елның теләсә кайсы вакытында кыргый хайваннарны күзәтсеннәр, шуңа өйрәнсеннәр, кыргый хайваннарның гадәтләре турында күбрәк белсеннәр», — дип сөйләде балалар экология-биология үзәге директоры Гүзәл Хөснуллина.

«Быел без Татарстан Республикасының бөтен территориясендә кышкы маршрут исәбен алып бардык. Түбән Кама районында 5-15 км озынлыкта 47 маршрут үткәрелгән. Бу маршрутларда без кыргый хайваннар һәм кошлар эзләрен исәпкә алдык. Маршрутларның гомуми озынлыгы 470 км. Без чаңгыда урман һәм кыр участокларын уздык», — дип сөйләде ТР Биологик ресурслар буенча дәүләт комитетының Түбән Кама районара бүлеге башлыгы Эдуард Иванов.