Түбән Камада Хушлашу йортын төзү мәсьәләсе буенча фикер алыштылар

Оешма әгъзалары башкарма комитет җитәкчесе вазыйфаларын башкаручы Радмир Беляев белән очрашты.

Киңәшмә барышында пенсионерлар берничә мәсьәләгә кагылды. Аларның берсе зиратның торышына һәм шәһәрдә яшәүчеләр мәрхүмнәрне соңгы юлга озата алырлык Хушлашу йортының булмавына кагылды.

Радмир Беляев бу мәсьәләне хәл итү белән оператив шөгыльләнергә күрсәтмә бирде. Зиратка килгәндә, анда тәртип урнаштыру эшләре башланды инде. Хәзер беренче чираттагы бурыч — зират территориясендәге юлларны ремонтлау.

Шулай ук ветераннар Советы Түбән Камада республика онкодиспансеры филиалы булмау темасына да кагылды. Бу мәсьәлә Татарстан сәламәтлек саклау министрлыгы белән фикер алышуга чыгарылачак. Шулай ук православие соборы һәм заманча Мәдәният сарае төзү кирәклеге турында да сөйләштеләр.

«Сез безнең территориянең лаеклы кешеләре. Мин иң беренче чиратта Сезгә нигез салганыгыз өчен рәхмәт белдерәсем килә. Шәһәр искиткеч, Россиядә башка андый шәһәрләр юк. Мин чын күңелдән диалогка әзер, без монда бернинди традицияләрне дә бозмаячакбыз, киресенчә яхшы якка арттырачакбыз», — дип мөрәҗәгать итте Түбән Кама муниципаль районы башкарма комитеты җитәкчесе вазифаларын башкаручы Радмир Беляев.