Түбән Камада ачык һава астында арт-галерея барлыкка киләчәк

Түбән Камада ачык һава астында арт-галерея барлыкка киләчәк. Илебезнең төрле шәһәрләреннән килгән танылган рәссамнар шәһәрне яңа мураллар һәм кече архитектура формалары белән тулыландырачак.

Урам сәнгате Түбән Каманың үзенчәлеген тулысынча чагылдырсын өчен, оештыручылар шәһәр халкын урамнарның сәнгати трансформациясен планлаштыруга җәлеп итте: түбәнкамалылар булачак программага булган өметләре турында фикер алыштылар һәм бергәләп объектларның урнашу урыннарын сайладылар. 

Яңа мураллар ясау процессын 3 этапка бүлгәннәр. Беренчесе — шәһәр белән танышу. Икенчесе, рәссамнар фикеренчә иң мөһиме — халык белән аралашу. Махсус моның өчен «База» креатив индустрияләр үзәгендә паблик-арт программасын эшләтеп җибәргәннәр. Ике көн дәвамында проектны оештыручылар, кураторлар һәм рәссамнар иҗтимагый киңлекләрне үзгәртеп кору темасына шәһәр халкы белән аралаштылар. Рәссамнарның беренче эшләрен августта ук күрергә мөмкин булачак.