Түбән Кама Татарстанда җәмәгать тәртибен мониторинглау өчен ясалма фәһем кулланылачак беренче шәһәр булырга мөмкин

Бүгенге көндә Россиянең барлык шәһәрләреннән мондый технологияләр бары тик Санкт-Петербургта гына кулланыла. «Түбән Кама мәгълүмат үзәге» директоры Максим Шаронов туры эфирда сөйләгәнчә, заманча видеокүзәтү камералары куркынычсызлык бурычларын гына хәл итеп калмый.

«Ясалма интеллект ярдәмендә алар төзекләндерүдә дә, башка юнәлешләрдә дә эшли башлыйлар», — диде ул.

Инде хәзер үк шәһәрдә ишегалларында машина кую урыннарының йөкләнешен анализлау өчен нейрочелтәр кертелә. Әлеге сынау проекты узган ел тестлаштыруны уңышлы узды. Шаронов сүзләренчә, системаның функционалы алгоритмнарны өстәмә өйрәтү хисабына акрынлап киңәячәк.

Шулай ук хокук бозуларны автомат рәвештә ачыклау системаларын үстерүгә аерым игътибар бирелә. Түбән Камада инде ясалма интеллекты булган камера эшли, ул чүп ташучы йөк машиналарының ябык булмаган тентларын теркәп бара. Хокук бозулар турындагы мәгълүмат автомат рәвештә административ-техник инспекциягә тапшырыла һәм транспорт чаралары хуҗаларын билгеләү һәм беркетмәләр төзү өчен ГАИ базасы белән интеграцияләнә.

Якын арада шәһәргә керү һәм чыгу юлларында хокук бозуларны танып белү функциясе булган өстәмә камералар урнаштыру планлаштырыла. Бу җәмәгать тәртибен һәм төзекләндерү кагыйдәләрен бозуның төрле төрләренә оператив җавап бирергә сәләтле комплекслы мониторинг системасы булдырырга мөмкинлек бирәчәк.