Түбән Кама районындагы авылда беренче ишегалды ремонтланды

Түбән Кама районы Афанас авылының Юбилей урамындагы 7 нче йорт ишегалдында ремонт эшләре төгәлләнде. Ремонт «Безнең ишегалды» республика программасы кысаларында башкарылган.

Район башкарма комитеты җитәкчесе урынбасары Роман Булатов дүшәмбе көнне планеркада хәбәр иткәнчә, ишегалдында тротуарлар ясалган, юллар киңәйтелгән һәм ремонтланган, урамнарны яктырту баганалары куелган. Тиздән анда кече архитектура формалары урнаштырылачак һәм территорияне төзекләндерү тәмамланачак.

2025 елда Түбән Кама районында «Безнең ишегалды» программасы буенча барлыгы 53 ишегалды төзекләндереләчәк, шуларның 44е — Түбән Камада.