Трудовой поселогында яшәүчеләр үзара салым программасы буенча юлларны яңарттылар

Республиканың үзара салым программасы ярдәмендә зур һәм кечкенә авыл җирлекләре яңартыла. Трудовой бистәсендә халыктан җыелган акча хисабына юлларны яңартуны һәм урам яктырткычларын алыштыруны дәвам иткәннәр. Яңа асфальт Пролетар урамында җәелде.

250 метр озынлыктагы юл өслеге авыл халкының үз теләге белән керткән взнослары ярдәмендә яңартылды. Үзара салым программасы кысаларында халык җыйган һәр сум өчен дәүләт бюджеттан 4 сум өсти.

«Шушы 5 ел эчендә генә дә 3 километрга якын суүткәргеч төзелде. Бу да үзара салым программасы хисабына. Тротуар җәелде, 2 км чамасы юл өслеге салынды», — дип сөйләде Майская Горка авыл җирлеге башлыгы Артем Морозов.

Узган ел Совет һәм Тынычлык урамнарындагы юллар һәм тротуарлар яңартылды. Моңа 2 млн 200 мең сумнан артык акча юнәлдерелгән. Пролетар урамындагы юл участогын ремонтлау быел 1 млн 900 мең сумнан артыкка төшкән. Соңгы ике елда Трудовой бистәсендә 60 тан артык урам фонаре алыштырылды.

Бистәдә бүген 500 дән артык кеше яши. Мәктәптә 38 бала укый, иң кечкенәләр өчен балалар бакчасы эшли. 

Быел үзара салым программасы кысаларында шулай ук Домостроителей урамындагы юлны ремонтлау планлаштырыла, бу 130 метрга якын юл полотносы. Моннан тыш, һәйкәлне төзекләндерүгә 900 мең сум тотылачак, анда яңа брусчатка җәеләчәк.