Татарстанда 1 апрельдән санитар-экологик икеайлык башлана

Татарстан Министрлар Кабинеты республикада 2025 елның 1 апреленнән 31 маена кадәр санитар-экологик икеайлык үткәрү турында боерык чыгарды. Документ ТР Хокукый мәгълүматның рәсми порталында бастырылган. Татарстанда муниципаль берәмлекләрнең башкарма комитетларына кайбер чаралар күрергә тәкъдим ителде.

Төп бурычларга халыкка һәм оешмаларга икеайлык үткәрү турында мәгълүмат бирү, 2025 елның 20 мартына кадәр Татарстан Республикасы Экология министрлыгында санитар чистарту буенча планнар эшләү һәм бирү, шулай ук төзекләндерү һәм калдыклар белән эш итү кагыйдәләрен үтәүне контрольдә тоту эшен активлаштыру керә.

Су саклау зоналарын, җәмәгать урыннарын, шәхси сектор территорияләрен һәм юлларны санитар чистартуга аерым игътибар бирелә.

Эшләрне башкару өчен волонтерлар һәм яшьләр оешмаларын җәлеп итү, шулай ук «Халык контроле» һәм «Мәктәп экопатруле» мәгълүмат системаларын кулланып, чүплекләр мониторингын алып бару планлаштырыла. Эшләр барышы турында мәгълүматны атна саен ТР Экология министрлыгына бирергә кирәк.

Икеайлыкның максаты — кыш буена җыелган чүп-чарны ачыклау һәм бетерү, территорияләрне тиешле экологик һәм санитар-эпидемиологик халәткә китерү.

Икеайлыкны үткәрү «Экологик иминлек» илкүләм проекты максатларына туры килә.