Сак булыгыз, дача! Бу үсемлекләрне үстергән өчен 8 елга кадәр иректән мәхрүм итү яный

Үсемлекләрнең кайбер төрләрен үз җир кишәрлегендә яки йорт яны территорияләрендә үстерергә ярамый — моның өчен штраф һәм хәтта төрмә дә яный. Бу хакта «Прайм» агентлыгына юридик фәннәр кандидаты, Плеханов исемендәге Россия икътисад университетының дәүләт һәм муниципаль финанслар кафедрасы доценты Ольга Леонова сөйләде. РИА Новости шул хакта яза.

Ул искәрткәнчә, үстерергә тыелган үсемлекләр исемлеге хөкүмәтнең 2010 елның 27 ноябрендәге 934 номерлы 2024 ел редакциясендәге карарында төгәл язылган. Анда шулай ук үсемлекләрнең зур яки аеруча зур күләмдә булуын билгеләү өчен саны да күрсәтелгән, бу җинаять-хокукый нәтиҗәләрне аңлау өчен мөһим.

Бу үсемлекләрдә наркотик яки психотроп матдәләр булуы куркыныч. Исемлектә мәк һәм киндер генә түгел, экзотик зәңгәр лотос, өч төсле ипомея, Гавай розасы да бар. Бакчачылар өчен бу зыянсыз чәчәкләр, аларны үстерү җитди проблемаларның сәбәбе булырга мөмкин.

Исемлектәге бер генә үсемлек тә йорт яны территориясендә табылса, бу 3 меңнән 5 мең сумга кадәр штраф рәвешендәге административ җәзага китерергә мөмкин. Аеруча зур күләмдә үстерү 8 елга кадәр төрмә срогы белән яный, дип йомгаклады Леонова.