Юрист дачада автомобиль юган өчен штрафлар турында кисәтте

Дачада автомобиль юган өчен штраф салынырга мөмкин. Бу хакта «Прайм» агентлыгына юрист Елена Пономарева хәбәр итте.

Ул машинаны юганда химик матдәләр белән су кулланыла, ул туфракны пычрата һәм әйләнә-тирә мохиткә зыян китерергә мөмкин, дип аңлатты. Шуңа күрә автомобильне бары тик автоюгычларда гына юарга кирәк.

«Әгәр автомобильне дачада юсаң, халыкның санитар-эпидемиологик иминлеген тәэмин итү өлкәсендәге законны бозган өчен җаваплылыкка тартырга мөмкиннәр (РФ КоАП 6.3 маддәсе). Кисәтү яки 100-500 сум штраф салынырга мөмкин», — дип белдерде эксперт.

Әгәр шул ук вакытта җир кишәрлекләренә зыян килсә, хокук бозучыга (РФ КоАП 8.6 маддәсе) 3 меңнән 5 мең сумга кадәр штраф салу ихтималы яный. Ә сулыклар янында транспорт чарасын юган өчен штраф 3 меңнән 4,5 мең сумга кадәр тәшкил итәчәк (РФ КоАП 8.42 маддәсе).

«Шул ук вакытта әгәр тулы кыйммәтле юу үткәрмәсәң, ә җиңелчә чистартсаң, ягъни фараларны, пыялаларны һәм теркәү билгеләрен чүпрәк белән сөртсәң, штраф булмаячак», — дип өстәде Пономарева.

Ул шулай ук аерым төбәкләрдә үз санкцияләре гамәлдә булырга мөмкин, дип искәртте. Мисал өчен, Мәскәү өлкәсендә махсус мәйданчыклардан тыш автомобиль юган өчен 3 меңнән 5 мең сумга кадәр штраф каралган.