Июльдән олы яшьтәге кайбер россиялеләрнең пенсиясе арта

Июльдән кайбер пенсионерлар арттырылган иминият түләүләре алачак. «Югары икътисад мәктәбе» илкүләм тикшеренү университетының хокук факультеты деканы, профессор Вадим Виноградов «Прайм» агентлыгына яңадан исәпләү пенсионерларның берничә категориясенә кагылачагын әйтте.

Беренче чиратта, бу июнь аенда 80 яше тулган гражданнарга кагыла: иминият пенсиясенә фиксацияләнгән түләү ике тапкыр арттырылачак һәм 17 815 сум 40 тиен тәшкил итәчәк. Июнь аенда медицина-социаль экспертиза нәтиҗәләре буенча беренче төркем инвалидлык билгеләнгән кешеләр дә шундый ук суммага исәп тота ала.

Әгәр пенсионерны карау рәсмиләштерелсә, күрсәтелгән түләүгә тагын 1 314 сум өстәлә һәм ул 19 129 сум 40 тиенгә җитә. Бу өстәмәне алу өчен Россия Социаль фонды бүлегенә гариза һәм документлар тапшырырга кирәк.

Шулай ук эшкә сәләтсез гаилә әгъзаларын караучы пенсионерларга өстәмә ярдәм чаралары да бар. Эшкә сәләтсез һәр кеше өчен (әмма өчтән дә артык түгел) 2 969 сум 23 тиен күләмендә өстәмә түләү исәпләнәчәк. Бу балигъ булмаган балаларга, инвалидларга яки эшкә сәләтсез дип табылган башка туганнарга кагылырга мөмкин.

Эксперт сүзләренчә, өлкән яшьтәге кешеләрне (анда шәхси мөрәҗәгать таләп ителә) карау очракларыннан тыш, күпчелек категорияләр өчен пенсияләрне яңадан исәпләү автомат рәвештә башкарыла. Виноградов искәрткәнчә, пенсия реформасыннан соң үз көченә кергән «Иминият пенсияләре турында»гы Федераль законның 17 маддәсе әлеге үзгәрешләр өчен нигез булып тора. Барлык үзгәрешләр дә түләүләрне алга таба индексацияләгәндә исәпкә алыначак.