Дәүләт Думасы 31 декабрьне рәсми ял көне дип игълан итүдән баш тартты

Дәүләт Думасы 12 декабрьдә елның соңгы көне — 31 декабрьне — мәҗбүри ял көне итәргә тәкъдим иткән закон проектын беренче укылышта карады. Нәтиҗәдә, парламентарийлар документны кире какты. Бу хакта ТАСС агентлыгына сылтама белән «Труд» газетасы яза, дип хәбәр итә «Татар-информ».

Закон проектында елның соңгы көнен эш көне булмаган бәйрәм көннәре исемлегенә өстәргә, ә бер уңайдан, шул рәвешле ялларның гомуми санын саклап, 8 гыйнварны ял көннәре исәбеннән төшереп калдырырга тәкъдим ителгән иде. Инициатива авторлары ачыклык керткәнчә, эш көне 31 декабрьгә туры килгәч, күп кенә хезмәткәрләр үз бурычларын тулысынча үтәми; аларның бер өлеше, бәйрәмгә әзерләнергә өлгерү өчен, ял ала.

Шуңа да карамастан, Думаның хезмәт, социаль сәясәт һәм ветераннар эшләре комитеты әгъзасы Светлана Бессараб журналистларга аңлатканча, беренче этапта документ Хөкүмәт аңа тискәре бәя бирү сәбәпле кире кагылган. «Шуның белән бергә, Хөкүмәт һәрвакытта да 31 декабрьне ял көне итәргә тырыша», — дип искәртте депутат «Лента. ру» хәбәрчесе белән әңгәмәсендә.

«Безнең тәкъдимнәр төрле иде, — дип өстәде Бессараб. — Бакчада эшләү (һ.б.) өчен язгы бәйрәмнәрне өстәп, Яңа ел каникулларын киметү турында да тәкъдимнәр булды. Әмма без оппонентларыбызны һәр төбәктә дә 1 майда бәрәңге утыртып булмавына (чөнки әле кар эреп бетмәгән була) инандырдык. Ә Яңа ел каникулларын исә кешеләр ярата».

Россиялеләр өчен алдагы Яңа ел каникуллары 2024 елның 29 декабреннән 2025 елның 8 гыйнварына кадәр дәвам итәчәк.