Быел Татарстанда 2,4 миллион кешегә гриппка каршы прививка ясау планлаштырыла

Бу сезонда Татарстанда яшәүче 2 429 285 кешегә гриппка каршы прививка ясау ниятләнә, бу төбәк халкының 60 процентын тәшкил итә. Бу хакта Роспотребнадзорның ТР буенча идарәсе җитәкчесе урынбасары Любовь Авдонина сөйләде, дип хәбәр итә «Татар-информ».

«Бүген без вакцинациягә әзерлек эшләрен башлыйбыз. Традиция буенча ул сентябрьдә старт ала», — дип билгеләде Любовь Авдонина.

Ведомствода грипп йоктыру куркынычы зур булган төркемнәр турында искә төшерделәр. Болар:

• мәктәпкәчә яшьтәге балалар;
• мәктәп укучылары;
• студентлар;
• медицина хезмәткәрләре һәм мәгариф хезмәткәрләре;
• кошлар, дуңгызлар үрчетүчеләр, зоопарк хезмәткәрләре;
• кошлар һәм хайваннар үрчетү белән шөгыльләнүче кешеләр.