Авылда эшләгән һәм яшәгән өчен
Авылда озак еллар эшләгән 60 меңләп пенсионерның пенсия акчасы артачак.
Моның өчен кешенең картлык яки инвалидлык буенча пенсия иясе булуы һәм авыл җирлегендә кимендә 30 ел хезмәт куюы, хәзерге вакытта авылда яшәве һәм эшләмәве шарт. Шул очракта гына пенсия акчагызга 1511 сум 12 тиен өстәләчәк икән. Авыл стажына кергән һөнәрләр исемлеге бар. Анда барлыгы 500 дән артык белгечлек күрсәтелгән. 2019 елдан исемлеккә яңа һөнәрләр өстәлгән. Мәсәлән, исемлек диспетчер, лаборант, табиб-эпизоотолог, ветеринария даруханәләре мөдирләре, шәхси эшмәкәрләр һ.б. белгечлекләр белән тулыландырылган.
Ә менә авыл хуҗалыгы советында, авыл кибетләрендә, балалар бакчаларында, медицина пунктларында эшләгәннәргә пенсия арттырылмый. Дөрес, бу оешмалар колхоз, совхоз, КФХ составына кергән очракта, акча өстәлә. Шулай ук гомер буе шәһәрдә эшләп, ахырдан авылга күченгәннәр дә өстәмә акча алмаячак.
Әгәр дә кеше гомере буе авылда эшләп, картайгач, шәһәргә китсә, пенсиясе авылга кайткан очракта гына артачак. Әгәр дә әле дә эшләсәгез, өстәмә акча алу өчен, эштән киткәч, пенсия фондына гариза язарга туры киләчәк. Өстәмә пенсия алып, эшкә урнашсагыз, ул акчадан коры калачаксыз. Алган акчаны кайтарырга туры киләчәк.
Фото: https://pixabay.com/ru/
Иң мөһим һәм кызыклы язмаларны Татмедиа Telegram-каналында укыгыз
