Кайда үтергәнен оныткан

11 ноябрьдә эчке эшләр идарәсенең дежур бүлегенә шалтыратып, Мәктәп бульварындагы 3нче йортның беренче катында урнашкан үз квартирында 54 яшьлек пенсионер ирнең үле гәүдәсе табылуы турында хәбәр итәләр. "Квартплата" түләмәгәнлектән электр уты өзелгән, гел китаптан гына торган бер бүлмәле квартирда, күкрәге һәм эче пычак белән җәрәхәтләнгән бу ирнең үлгән килеш ундүрт көнләп ятканлыгы ачыклана.
Ә ул кешене үтерүче исә үзе җинаять эшләгән төндә үк, теге квартирдан чыгышлый аптекага кергән һәм канлы фаҗиганең ничек булганын сөйләп биргән була. Әмма бик нык салганлыктан, ул квартирның кайсы йортта урнашканын әйтә алмый. Бары тик беренче катта икәнен, бер генә лампочка янган бүлмәдә китаплар күплеген генә исенә төшерә ала. Тирә-якны тикшереп чыксалар да, ул чагында полиция хезмәткәрләре мәет яткан квартирны таба алмыйлар.
Азагы канлы җинаять белән төгәлләнгән ул вакыйга түбәндәгечә була.
27 октябрьдә кичке уннар тирәсендә 1971 елгы бер адәм (2002 елда караклык өчен хөкем ителгән булган), исерек хәлдә өенә кайтышлый, "Кама" кунакханәсе янәшәсендәге "Фактория" кибете янында Сергей исемле бер кеше белән сөйләшеп китә. Какча гәүдәле, карап торышка илле яшьләр тирәсендәге сакаллы бу адәм, бергәләп салып утыру өчен, аны үз өенә чакыра. Бик нык исерек булган 1971 елгы ир үзләренең кайсы йортка, ничәнче квартирга керүләрен исендә калдырмаган. Аш бүлмәсендә эчеп утырганда, ике арада бәхәс чыга. Җинаятьче үзе сөйләвенчә, янәсе квартир хуҗасы аңа үтерү белән яный. Курка калган кунак үзенең ничек итеп пычакка ябышканын сизми дә кала. Ул хуҗага рәттән ун мәртәбә пычак белән кадый һәм квартирдан чыгып, аптекага юнәлә. Анда кергәч, нәрсә булганын аңлатып, полиция хезмәткәрләрен чакыртырга куша.
Бүгенге көндә аңа карата җинаять эше кузгатылган.