Исерек баштан

1 гыйнварда өч кешегә пычак белән кадаганнар, шуларның берсе үлгән. Корабельная урамындагы 26нчы йортта иртәнге сәгать дүрттә 17 яшьлек исерек егет 33 яшьлек җизнәсен пычак белән кадап үтергән. Шинчылар урамындагы 81нче йортта 31 яшьлек берәү зыян күргән. Әмма бусында авыр тән җәрәхәтләре алган әлеге исерек үзе гаепле: ул, подъездда танышлары белән сыра эчеп утырганда, килеп кергән бер егеткә бәйләнгән. Егет, үзен якларга теләп, теге бәйләнчекнең бавырына пычак белән кадаган һәм башына китереп суккан. Шул ук төнне Сөембикә урамындагы 13нче йортта 34 яшьлек хатын 33 яшьлек иренә пычак белән кадаган.