Февраль аенда 15 яшьлек кызның (Алия дип атап торыйк) бала табуы турындагы хәбәргә әлләни ис китмәде. Юк-юкта мондый очраклар булып тора, бала-чага тиз өлгерә бит хәзер, моның бик матур сүзе дә бар - "акселерация" дип авызны томалап куялар. Табиблар әйтүенчә, сабый да, яшь ана да үзләрен яхшы хис итәләр икән....
Февраль аенда 15 яшьлек кызның (Алия дип атап торыйк) бала табуы турындагы хәбәргә әлләни ис китмәде. Юк-юкта мондый очраклар булып тора, бала-чага тиз өлгерә бит хәзер, моның бик матур сүзе дә бар - "акселерация" дип авызны томалап куялар. Табиблар әйтүенчә, сабый да, яшь ана да үзләрен яхшы хис итәләр икән. Ә шулай да үзе дә бала булган анага яңа туган сабыен бирергә ашыкмыйлар.
Ник дигәндә, сабыйны алып кайтасы квартирда шартлар, йомшак итеп әйткәндә, арт якка утырырлык. 15 яшьлек Алиянең үз квартиры юк әлбәттә, ә аның әнисенең квартирында өч эт, ике песи, саны билгесез тарканнар армиясе һәм башка хәшәрәтләр мыжгып торуы билгеле. Квартир хуҗасы үзе кухняда, ә этләре иркен залда яшиләр икән.
Гаилә күптән опека һәм попечительлек бүлегендә исәптә тора. Кыз биш класс кына укыган да башка мәктәпкә йөреп вакланып тормаган. Әби кеше шәһәр чүплекләреннән чүп җыю белән мәшгүль.
Яңа туган сабыйның әтисенә (исемен Рөстәм дип атыйк) 16 яшь, агропромешленность колледжында укыган, әлегә бер җирдә дә эшләми. Яңа туган сабыйга нинди акчага әйберләр алырга (памперс, пеленка, имезлек һ.б.) җыеналар - билгесез, әле монда ике җирдә эшләп тә акчаны җиткереп булмый.
Баланы Рөстәмнең әти-әнисенә опекага алырга тәкъдим итсәләр дә, тегеләре риза булмаган, ә Алиянең әнисе сәламәтлегенең начараеп китүен сәбәп иткән.
Үзләре дә балалыктан чыкмаган бу ике баланың никахлары да рәсмиләштерелмәгән (яшьләре җитми). Моның өчен мәгариф министрлыгының рөхсәте кирәк икән. Рөхсәт алынып, Алия белән Рөстәм язылышсалар, аларга сабыйларын бирергә мөмкиннәр. Тик дөньяны үзләре дә танып белмәгән яшь ата-ана, сабыйларына нинди тәрбия бирер - шкиләндерә.
Сүз уңаеннан, шәһәребездә ел саен 14-15 яшьлек кызларның бәби табуларының бер-ике очрагы була икән.
Дөрес, борын-борынгыдан Таһир-Зөһрәләр мәхәббәте булган инде ул. Тик тарихка аларның мәхәббәте саф, матур булып кереп калган. Ә бу парның тараканлы өйләре белән кереп калса гына инде.
